Այսօր ՀՀ ազգային անվտանգության ծառայության (ԱԱԾ) և հակակոռուպցիոն կոմիտեի (ՀՀԿ) աշխատակիցները խուզարկություն են իրականացրել «Բարգավաճ Հայաստան» (ԲՀԿ) կուսակցության նախընտրական ցուցակով պատգամավորի թեկնածու առաջադրված Անդրանիկ Թևանյանի բնակարանում։
Խուզարկությունը սկսվել է ժամը 12։00-ի սահմաններում և շարունակվել է շուրջ 4 ժամ։ Խուզարկությունից հետո իրավապահները բնակարանից դուրս են բերել համակարգիչ։
«Խուզարկությունների որոշումները ձևակերպված էին այնպիսի անհեթեթ կերպով, որ անհասկանալի էր, թե ինչն էին եկել խուզարկելու՝ և՛ մեր կուսակցության գրասենյակում, և՛ իմ բնակարանում, հիմա էլ՝ ավտոտնակումս»,- ասաց Անդրանիկ Թևանյանը՝ նշելով, որ իրավունք չունի բացահայտելու, թե ինչ իրեր են տարել, քանի որ ստորագրություն է տվել, որ նախաքննության շրջանակում այդ մասին չի կարող խոսել։ Նա հավելեց, որ գրասենյակի խուզարկությունների ընթացքում առգրավվել է նաև 7or.am լրատվական կայքի գույքը, ինչի հետևանքով նախընտրական շրջանում խաթարվել է կայքի աշխատանքը։
Ինչ վերաբերում է իր նկատմամբ անձեռնմխելիությունից զրկելու և քրեական հետապնդում նախաձեռնելու հարցին, ապա Թևանյանը նշեց․ «Ինչ ղալաթ ուզում են, թող անեն»։
Այսպիսով, իրավապահ մարմինների գործողությունները շարունակվում են ԲՀԿ-ի նախընտրական շտաբի և կուսակցության առաջատար անդամների նկատմամբ։
Հիշեցնենք, որ Քաղաքացիական պայմանագիր կուսակցության վարչապետի թեկնածու Նիկոլ Փաշինյանը մայիսի 20-ին հայտարարել էր, որ ԱԱԾ-ն Թևանյանի դեմ հաղորդում կուղարկի ՀՀԿ՝ հայրենիքի դավաճանության հոդվածով քրեական գործ հարուցելու համար։ Թևանյանը, իր հերթին, հայտարարել էր, որ հենց Փաշինյանն է պետական դավաճան և ապագայում ստիպված կլինի պատասխան տալ իր գործողությունների համար։
Մայիսի 21-ին ՀՀԿ հայտնել էր, որ Անդրանիկ Թևանյանի նկատմամբ քրեական վարույթ է նախաձեռնվել պետական դավաճանության և լրտեսության մեղադրանքով։
